அம்புலிமாமா

அம்புலிமாமா ப‌ழைய‌ ப‌திப்புக‌ளை இணையத்தில் பார்த்தவுடன் மகிழ்ச்சி. தமிழ் புத்தகங்கள் 1947 முதல் 2005 வரை கிடைக்கின்றன. தமிழ், ஆங்கிலம், கன்னட, மலையாளம், பெங்காலி, மராட்டி, ஒரியா போன்ற முக்கிய மொழிகள் அனைத்திலும் கிடைக்கின்றன. எனக்குத் தான் இது புதிய தகவலா என்று தெரியவில்லை. என் பால்யத்தில் முக்கிய இடம் கண்டிப்பாக அம்புலிமாமாவுக்கு உண்டு. http://www.chandamama.com/archive/storyArchive.htm வில் அனைத்து பழைய எடிசன்கள் உள்ளன. விளம்பரங்களும் தனியாக உள்ளன.

இது என் ப்ளாகில் எழுதிய‌து

The mixed-up chameleon - புத்தகம்

The mixed-up chameleon - Eric Carle

வயது : 3-6
மொழி : ஆங்கிலம் & இந்தி
விலை : ரூ 175


எரிக்-இன் புத்தகங்களுக்கு அறிமுகம் தேவையில்லைதான், The very hungry caterpillar ஒன்றே போதும்! வழக்கம்போல எளிய கதை. தன் தோற்றத்தைக் குறித்தும், தனது சுவாரசியமற்ற வாழ்க்கையைக் குறித்தும் அதிருப்தியடைகிற ஒரு பச்சோந்தியே மெயின் கேரக்டர். தன்னால் நிறங்களை மாற்றிக்கொண்டு வாழ முடியுமென்று அறிந்திருக்கிறது. நாவை நீட்டி பூச்சிகளைப் பிடித்து உணவுண்கிறது. அதனால் பெரிதும் பயனில்லை என்று நினைக்கிறது.

ஒரு நாள் ஜூவிற்குச் செல்கிறது. அங்கு பல விலங்குகளைப் பார்க்கிறது. அந்த விலங்குகளின் உடலமைப்போல தனக்கும் இருந்தால் நன்றாக இருக்குமேயென்று எண்ணுகிறது. அப்படி எண்ணியதும் அது விருப்பப்படியே நடந்தும் விடுகிறது. ஃபெளமிங்கோவின் கால்களும், ஒட்டகச்சிவிங்கியின் நீண்ட கழுத்தும், நரியைப் போன்ற வாலும் கிடைக்கப் பெறுகிறது. இப்படி எல்லாமுமாக இருக்கும் நேரத்தில் ஒரு பூச்சி பறந்துச் செல்வதைப் பார்க்கிறது.மாற்றங்கொண்ட தோற்றத்தால் பச்சோந்தியால் பூச்சியைப் பிடிக்க இயலவில்லை. பூச்சியை பிடிக்க வேண்டுமானால் அது பழையத் தோற்றத்துக்கு திரும்ப வேண்டுமென்பதை அறிந்து பழைய பச்சோந்தியாக மாற விரும்புகிறது. அதன் விருப்பமும் நிறைவேறுகிறது.




வண்ணமிகு படங்களுடன், கொஞ்சமே கொஞ்சம் எழுத்துகள் இருக்கிற புத்தகங்களையே தேர்ந்தெடுப்பது எனது வழக்கம். அந்த வகையில், படங்களே இந்தப் புத்தகத்தின் மிகப்பெரிய பலம். பலவகையான விலங்குகளின் தனிச்சிறப்பம்சங்களை அழகாக விளக்குகிறது. எல்லாவற்றுக்கும் மேல் நாம் நாமாக, நமதுத் தனித்தன்மையுடன் இருப்பதன் அவசியத்தையும், அழகையும் சொல்லாமல் சொல்கிறது. மற்றுமொரு கலக்கலான புத்தகம் எரிக்கிடமிருந்து!


வெளிநாட்டு பதிப்பு - போர்டு புத்தகம் எழுநூறு ரூபாய்கள் வரை. ஆனால், இதன் இந்திய பதிப்பு கரடி டேல்ஸ் மற்றும் அமரசித்ர கதாவிலிருந்துக் கிடைக்கிறது, ரூ 175-க்கு. இந்தி மற்றும் ஆங்கிலத்தில் கதையின் வரிகள்.

சென்னைவாசிகளுக்கு : பெசன்ட் நகரில் words&worth என்று ஒரு கடை இருக்கிறது. சிறிய கடைதான். மிககுறைந்த விலையில் நல்ல புத்தகங்கள்,இந்திய பதிப்பில் கிடைக்கிறது.

Words & Worth
2nd Avenue, Indira nagar,
Besant nagar,
chennai.

Grizzly Dad - புத்தக விமர்சனம்

கதை : Grizzly Dad
மொழி : ஆங்கிலம்
வயது : 3-8 வயது வரை


ஒரு நாள் காலையில் அப்பா எழுவதற்கு மனமில்லாமல் எழுகிறார். எழும்போதே மூட் அவுட்!திரும்ப படுக்கைக்குச் சென்று விடுகிறார். குட்டிப்பையன் அப்பாவின் பொறுப்பில். அம்மா தங்கைகளைக் கூட்டிக்கொண்டு தங்கைகளை பள்ளியில் விட்டு விட்டு வேலைக்குச் சென்றுவிடுகிறார். குட்டிப்பையன் அப்பாவை எழுப்புகையில், தன் அப்பா ஒரு பெரிய கரடியாக மாறிவிட்டிருப்பதைக் காண்கிறான்!!அப்பா-கரடிக்கு முகம் கழுவ, ரெடியாக உதவி செய்கிறான். காலை உணவை இருவரும் அருந்துகிறார்கள். அப்பா, கரடியாக இருப்பதால் எல்லாவற்றையும் மேலே கீழே கொட்டி வீட்டை வீட்டை நாசமாக்குகிறார். பின்னர் சிறுவனும் அப்பா-கரடியும் சினிமாவுக்குப் போகிறார்கள், பின்னர் பார்க்கில் சென்று ஸ்கேட்டிங் பழகுகிறார்கள், கரடிக்கு ஸ்கேட்டிங் தெரியாததால் சிறுவன் கற்றுத் தருகிறான். கரடி சிறுவனுக்கு மரம் ஏறவும், ஒன்றுமே செய்யாமல் மரக்கிளையில் எபபடி இருப்பது என்றும் சொல்லித் தருகிறது. பின்னர் வீட்டுக்கு வந்து இருவரும் சாண்ட்விச் செய்து சாப்பிடுகிறார்கள். கரடி சிறுவனை கட்டியணைத்துக்கொள்கிறது. அந்த நொடியில் கரடி திரும்ப அப்பாவாகிவிடுகிறது! அம்மாவும் தங்கைகளும் வீடு வந்து சேர்கிறார்கள். வீடு குப்பையாக இருப்பதை பார்க்கும் அம்மா, இது வீடா அல்லது பன்றிகளின் கூடாரமா என்று கேட்கும் போது இருவரும் சுத்தம் செய்யக் கிளம்புகிறார்கள். அப்போது இருவருக்கும் பன்றிக்குட்டியின் வால் முளைத்து இருக்கிறது!! :-)




உணர்ச்சிகளை பற்றிய ஒரு எளிதான கதை. கதையில், பப்புவை மிகக் கவர்ந்த அம்சம் படங்கள். அப்பாவுக்குக் கோபம் இருந்தாலும், அதைச் சிறுவனிடம் வெளிக்காட்டாமல் இருவரும் ஒரு நாளை எப்படி செலவழிக்கிறார்கள் என்றும் சொல்கிறது, சிறுவனின் பார்வையில்!!

பபில்ஸ்

Grow up reading with Bubbles

வயது வரம்பு : 2 முதல் 6 வரை
மொழி : ஆங்கிலம்

அதிலுள்ள ஆறு கதைகள் :

1. Bubbles goes to School
2. Bubbles The Artist
3. Bubbles Plays with Fire
4. Bubbles Has a Toothache
5. Bubbles The Litterbug
6. Bubbles Is Selfish

கதைகள் என்பதை விட ஆறு சிறு நிகழ்வுகள். Bubbles என்னும் குட்டிக் குரங்கு கதாநாயகன். பள்ளி என்றால் என்ன?, சுவரில் வரையாமல் பேப்பரில் வரை, தீயில் விளையாடக் கூடாது, நிறைய மிட்டாய் சாப்பிடக்கூடாது, குப்பைக்கூடையில் தான் குப்பை போட வேண்டும், பகிர்ந்து விளையாட வேண்டும் என்பதே ஆறு கதைகளின் சாராம்சம்.

படங்கள் மிகவும் தெளிவாக இருக்கின்றன. எழுத்துக்களுக்கும் மிகவும் பெரிதாக இருக்கின்றன. நாம் வாசித்துக் காட்டுவதற்கும், வாசிக்கப் பழகும் குழந்தைகளும் உபயோகப்படுத்தும் படியுள்ளது.

வாசிக்கும் பொழுதே தன்னை Bubblesஉடன் ஒப்பிடத் தொடங்கிவிட்டாள். நான் மிட்டாய் நிறைய சாப்பிட மாட்டேன், நான் முந்தி தான் சுவத்தில வரஞ்சேன் போன்றவை. ஒரு முறை படித்துக் காட்டிய உடன் படங்களைப் பார்த்தே கதை சொல்லிவிடலாம்.

கதைகள் சிறார்களுக்கு மிகவும் விருப்பமாக இருக்கும் படி இருக்கின்றன. மூன்று நாட்களில் கிட்டத்தட்ட பத்து முறையேனும் வாசித்து இருப்போம். பயனுள்ளப் புத்தகம்.

மாண்டிசோரி புத்தகம்

சந்தனமுல்லையின் கூற்றுக்கிணங்க, மாண்டிசோரி புத்தகம் "A montessori mother" by Dorothy Canfield Fisher download செய்வது பற்றிய தகவல் இங்குள்ளது.

கசகச பறபற !!

புத்தகம் : கசகச பறபற
வயது : 2-6
வழி : தமிழ்
எழுதியவர் : ஜீவா ரகுநாத்


பப்பு-விற்கு கதைசொல்லும் ஜீவா ஆண்ட்டியைப் பிடிக்கும். எனக்கும்தான்! ஒருநாள் பப்பு சொன்னாள், “நாந்தான் ஜீவா ஆண்ட்டி”! பப்பு, ஒருவேளை ஜீவா ஆண்ட்டியின் கதைசொல்லும் பாதையை தேர்ந்தெடுக்ககூடும்! ஒரு சிறு கற்பனை, கதையாக நெய்யப்பட்டு ஒரு குழந்தையின் மனதை, அதன் உலகத்தை எப்படி ஆள்கின்றது! இந்தப் புத்தகம், “கசகச பறபற” என்ற புத்தகமும் ஜீவா ஆண்ட்டியினுடையது தான், தூலிகா பதிப்பகத்தாரிடமிருந்து!

குழந்தைகளும் பெரியவர்களும் ஒன்றாக படித்து மகிழ என்று அறிமுகமாகும் இந்தப் புத்தகம்,
தமிழ் எழுத்துகளை, வார்த்தைகளை சிறார்களுக்கு அறிமுகப் படுத்துகிறது, ஒரு புதிய நடையில்! நாம் கற்ற வழிகளில் அல்ல..ஒரு புதிய வழியில்,எழுத்துகளை இப்படிதான் கற்கவேண்டுமென்ற எந்த விதிகளுக்கும் உட்படாமல், வார்த்தைகளை இப்படிதான் படிக்க
வேண்டுமென்ற நியதியிலிருந்து மாறுபட்டு! எந்த வயதினருக்கும் இது ஏற்றதுதான்..மிக எளிமையான வார்த்தைகள்..எழுத்துகள் இதில் ஒரு மனிதனாக, மிருகமாக அல்லது செயலாக வெளிப்படுகின்றன!

"சந்தன சாலையிலே
சின்ன சீதா போனாளே!"

என்று துவங்கும் பாடல் ”ச” என்ற எழுத்தை முதன்மைத் தொனியாகக் கொண்டு ஒலிக்கிறது! அது ”சோ”டாவாகவும், ”சௌ”க்கியமாகவும் மாறி அதற்குள் ஒரு சிறு சம்பவத்தை உள்ளடக்கியிருக்கிறது! ஒவ்வொரு எழுத்தும் ஒரு சிறு சம்பவத்தை..அல்லது கற்பனைச் சித்திரத்தை முன் வைத்து எழுத்துகளை அறிமுகப்படுத்துகிறது! அது நமக்குவேண்டுமானால் சுவாரசியமானதாக இல்லாமல் இருக்கலாம் சில வேளைகளில், ஆனால் சிறார்களுக்கு ஒரு கற்பனை உலகத்தை அமைக்கக்கூடும், நம்மையறியாமலேயே!

புத்தகத்தின் இரு பக்கங்களை இணைத்துள்ளேன், மாதிரிக்கு! ஒவ்வொரு எழுத்தும் இரண்டு பக்கங்களில், ஒரு பக்கத்தில் எழுத்துகளாக, மறுபக்கத்தில் அதன் கற்பனை வடிவமாக!



”சிங்கம்”, ”மங்கை” , ”சங்கு” என்று வார்த்தைகளும், அதனுடனே பின்னப்பட்ட காட்டுச்சிங்கத்தின் முழக்கமும் பாடலாக!



நெ..நௌ எனும் எழுத்துகளை நம்மால் எப்படி கற்பனை செய்யமுடியும்..இந்தப்ப்புத்தகத்தில், அது கழுத்து நீண்ட நெருப்புக்கோழியாகவும், ஒரு நாரையைப் போலவும் உருமாறி இருக்கிறது. ஒரு மேள சத்தத்தை ரசிக்கிறது!

படங்கள்தான் இந்தப் புத்தகத்தின் மிக பெரிய பலம். ஓவியர் அசோக் இராசகோபாலனின் ஓவியங்கள் இப்புத்தகத்தில் பிள்ளைகளின் ரசிப்புக்கும் சிரிப்புக்கும் ஏற்ற வகையில்!

4-6 வயதினருக்கு தமிழ் எழுத்துகளைக் கற்க, அதன் பயன்பாட்டினை அறிமுகப் படுத்த உதவலாம்!

2-4 வயதினருக்கு, எழுத்துகளையும் அதன் சப்தங்களையும் அறிமுகப்படுத்தலாம் பாடலைப் படித்துக்காட்டுவதன் மூலம்!

வளர்ந்து வரும் வயதில்- சமூகசூழல்,பெற்றோர், பள்ளி என்று பல்வேறு காரணிகள் குழந்தைகளை அவர்தம் ஆளுமையை தீர்மானிக்கிறது! நம்மையறியாமலேயே, நாம் நமது எண்ணங்களையும், கருத்துகளையும் திணித்துவிடுகிறோம்...நம்மைப் போன்ற ஒரு காப்பியையே உருவாக்க முனைகிறோம். இப்படி இரு, இப்படி படி என்று... ஏன்? ஏனெனில், நானும் இப்படித்தான் இருந்தேன், இப்படித்தான் படித்தேன் என்பதுதான் பதிலாக இருக்கலாம்! ஆனால், இப்படியும் இருக்கலாமென்றும், இப்படியும் எண்ணலாமென்றும், அப்படியிருப்பதால் சிந்திப்பதால் தவறொன்றும் இல்லை என்பதையும் கண்டுக் கொள்ளக் கூடும்! இந்தப்புத்தகம்
அதற்கு உதவக்கூடும்!

Bubbles series - Kids books

புத்தகம் : Bubbles Owns Up, Bubbles Goes to School,Bubbles the Artist
வயது : 2-6
வழி : ஆங்கில புத்தகம்


எளிய புத்தகம். எளிய வார்த்தைகள். எளிய நடை. குழந்தைகளைக் கவரும் விதத்தில் படங்கள். ஏனோ, எளிய புத்தகங்களே எனக்கு விருப்பமானவை, பப்புவிற்கு படித்துக் காட்ட, கதைச் சொல்ல..

பபிள்ஸ் தான் இந்த சீரீஸின் ஹீரோ! 7-10 பக்கங்களுக்கு மிகாமல் இருக்கும். எளிய ஆங்கில வார்த்தைகளில் கதாபாத்திரங்கள் பேசுவதுதான் மொத்தக் கதை! உதாரணத்திற்கு, பபிள்ஸ் ஓன்ஸ் அப் என் சீரிஸில், பபிள்ஸ் தனதுப் பொருட்களை எப்படி பத்திரமாக வைத்துக் கொள்கிறான் எனது சிறு சிறு நிகழ்வுகள் மூலம் விளக்கப் பட்டிருக்கும்!

எல்லாப் புத்தகத் தொடருமே, ஏதாவதொரு நல்ல வழக்கத்தை அடிப்படையாகக் கொண்டு, நமது அன்றாட நிகழ்ச்சிகளின் மூலம் சொல்லப்பட்டிருப்பதுதான் இதன் பலம். வெகு எளிதில் குழந்தைகள் அந்த இடத்தில் தங்களைப் பொருத்திக் கொள்வார்கள்.

தடிமனாக இல்லாமல் மெல்லிய பக்கங்களாக இருப்பதால், பெரியவர்களின் அருகாமை அவசியம்!

பபிள்ஸ் புத்தகம் பற்றிய மேல்விபரங்கள் இங்கே!!

Rabbit's Happy டே- Kids Book review

Rabbit's Happy day
பிரிவு : ஆங்கிலப் புத்தகம்
பரிந்துரைக்கப் பட்ட வயது : நான்கு-ஏழு வயதுவரை
மூன்று - ஐந்து வயதினரும் உபயோகிக்கலாம்.




”எங்க அம்மா பிசியா இருக்காங்க, நான் என்ன பண்றது, என்கூட விளையாட யார் இருக்காங்க” என்று முயல்குட்டி சொல்லவதாக ஆரம்பிக்கும் இக்கதை, பப்புவின் சூழலை பிரதிபலிப்பதாலேயோ என்னவோ, இந்தப் புத்தகம் பப்புவிற்கு பிடித்தமானது!

கையில் பந்துடன் கேரட் செடிகளுக்கு மத்தியில் குளக்கரையில் அமர்ந்திருக்கும் முயல்குட்டி, விளையாட யாருமின்றி இருப்பதாக் நினைக்கும் வேளையில், எதிர்பாராத வண்ணம் சந்திக்கிறது பல முயல்குட்டிகளை! அதன் மீதி பொழுது எப்படி போகிறது
என்பது தான் கதை!

ஆனால், அந்த முயல்குட்டிகள் தங்களை எவ்வாறு அறிமுகப்படுத்திக் கொள்கின்றன தெரியுமா, “we are your little brothers and sisters". நாங்கள் உன் குட்டிச்சகோதரர்கள் என்றுக் குதித்தோடி வருகின்றன இரு குட்டிகள். முயல் இப்போது சொல்லிக் கொள்ளும், மூன்று பேர்கள் இருக்கிறோம் இப்போது! திடீரென முளைக்கின்றன, இரு குட்டிச்சகோதரிகள். இப்போது முயல் சொல்லிக்கொள்ளும், மொத்தம் ஐந்து பேரென! இப்படியாக, கால்பந்து விளையாட ஒவ்வொரு அணிக்கும் ஐந்து பேராக மொத்தம் பத்து முயல் குட்டிகள் எப்படி சேர்கின்றன என்பதுதான் மொத்தக் கதையும்!

ஒருவகையில், எண்களை அறிமுகப் படுத்த உதவி செய்வதோடு, எண்ணவும் அதாவது கூட்டலை அறிமுகப்படுத்தலாம், மிக எளிய முறையில்!

சுவாரசியமான் சம்பவங்களோ, அல்லது சவாலானக் காரியங்களோ அல்லது செய்தி(moral) - இப்படியான ஒன்றை எதிர்பார்ப்பீர்களானால் அது கிடையாது. தூங்கப் போவதற்கு முன் உங்கள் 4 வயது குட்டிக்கு சொல்ல ஏற்றக் கதை..சிறிய கதை..மகிழ்ச்சியும், இதமான நினைவுகளுடனுமாக முடியும் கதை! கூடுதலாக, இது ஜொலிக்கும் தாளாலானது, குட்டிகள் விரும்பும் வண்ணம்!

தகிட்ட தரிகிட்ட குதிக்கும் பந்து

தகிட்ட தரிகிட்ட குதிக்கும் பந்து
தமிழில் : ஜீவா ரகுநாத்

வயது : மூன்று - ஐந்து வயதினருக்குட்பட்டது


இந்தப் புத்தகத்தின் தலைப்பால் ஈர்க்கப்பட்டு கையில் எடுத்து என் மகளின் கண்களால் வாசிக்கத் தொடங்கினேன். 16 பக்கங்கள். முடிக்கும்போது, நானே ஒருவித தாள-லயத்துடன் படித்துக்கொண்டிருப்பதை உணர்ந்தேன்.

வெகு எளிமையான புத்தகம். கோட்டுச்சித்திரங்கள் போன்ற எளிமையான படங்களுடன் இயல்பான வார்த்தைகளுடன் கூடிய புத்தகம். அபுவின் பந்து உதைக்கப்படும்போது அது பயணிக்கும் திசைகளில், சுழன்று விழும் இடங்களையும் சுவைப்பட சொல்லிச் செல்கிறது ஒருவித தாள கதியில்.

திந்தக்கம் திந்தக்கம் திந்தக்கம் தா என்றும் தரிகிட்ட தகிட்ட தரிகிட்ட தகிட்ட தா என்றும் பரதத்தின் தாளத்தில் சொல்லும் பாங்கு குழந்தைகளை ஈர்ப்பதாயிருக்கிறது. சில வாக்கியங்கள் முடியும்போது ஒரே மாதிரி வார்த்தைகளால் முடிவதால், பப்புவும் என்னோடு சேர்ந்து சொல்ல ஏதுவாயிருக்கிறது. பந்து செல்லும் ஒவ்வொரு இடமும் நமது கற்பனைக்கேற்றவாறு காட்சிகளை விரிக்கலாம்.

மேலும் மெயின் கதாபாத்திரம் அபு மற்றும் பந்து. அபுவின் காலடியிலிருந்து எழும்பிய பந்து
ஊரின் பல இடங்களை சுற்றி அவனது காலடிக்கே எப்படி, யார் யாரை சந்தித்து வருகிறது என்பது கதை.

ஒவ்வொரு பக்கமும் அதிகபட்சம் 15 வார்த்தைகளில் இருப்பதால், எழுத்துக்களை கற்கும்போதும் உபயோகமாக இருக்கும். இரண்டு வயதினருக்குக் கூட படித்துக்காட்டலாம்.

குழந்தைகளுக்கு எந்தப் புத்தகம் பிடிக்குமென்று தெரிந்துக் கொள்வது எளிதல்ல. அவர்களாக படிக்க துவங்கும் வரையில், தேர்ந்தெடுத்து வாசிக்கும் பழக்கம் வரும்வரை பெற்றோர்களாக நாம்தான் புத்தகங்களை தெரிவு செய்ய வேண்டியதாயிருக்கிறது. அதாவது, நாம் அவர்களுக்கு இது பிடிக்கலாமென்று எண்ணி மட்டுமே தெரிவு செய்கிறோம். அது சில சமயங்களில் சரியாகவும், சில சமயங்களில் தவறாகவும் போய்விடுகிறது. இந்த புத்தகம் அப்படி சரியான ஒன்றாக, நீண்ட நாள் நினைவில் நிற்கக் கூடியதாக இருக்கும் என நம்புகிறேன்.


மூலக்கதை மலையாளத்தில் : ஜேகப் சாம்சன் முட்டடா

பதிப்பகம் : தூலிகா